تاند (چهارشنبه، د زمري/ اسد ۱۴ مه) په داسي حال کې چې په پاکستان کې ناامنۍ په زیاتېدو دي، پاکستاني چارواکو د نړیوالو رسنیو پر فعالیتونو نوي محدودیتونه لګولي دي.
د بي بي سي د راپور له مخې، د بهرنیو رسنیو خبریالان او همکاران، د پاکستاني وګړو په ګډون، له اسلاماباد، کراچۍ او لاهور پرته په نورو سیمو کې د راپور جوړولو لپاره باید مخکې له مخکې د حکومت رسمي اجازه یا د «نه اعتراض سند » (NOC) اجازه لیک ترلاسه کړي.
د پاکستان د حکومت دا پرېکړه د خبریالانو د ملاتړ بنسټونو له سختو نیوکو سره مخامخ شوې ده.
دا مقررات د «۲۰۲۶ کال د بهرنیو رسنیو د اسانتیاوو لارښود» تر نوم لاندې نافذ شوي دي. منتقدان وایي، دا اقدام به په عملي ډول په پاکستان کې د نړیوالو رسنیو خپلواک میداني راپورونه د حکومتي چارواکو له اجازې او پرېکړې سره وتړي.
د راپور له مخې، د پاکستان حکومت ادعا کوي چې د دې مقرراتو هدف د رسنیو محدودول نه، بلکې د خبریالانو د تائید، همغږۍ او اداري چارو تنظیمول دي. خو په دې اړه څه نه وايي چې ولې د پنجاب ښارونه او کراچۍ له دې مقرراتو استثنا دي.
د خبریالانو او د بیان د ازادۍ ملاتړي بنسټونه هم وایي، د NOC ترلاسه کولو بهیر روښانه نه دی او پخوا هم دا سندونه یا له اوږده ځنډ وروسته ورکول کېدل او یا به هېڅ نه صادرېدل.
د پاکستان د ډان ورځپاڼې مسوول مدیر ظفر عباس دا محدودیتونه «نه منونکي» بللي او ویلي یې دي، په څه باندې څلوېښت کلن ژورنالیستیک ژوند کې یې، حتی د پوځي حکومتونو پر مهال هم، د رسنیو پر وړاندې دومره سخت محدودیتونه نه وو لیدلي.
د نویو مقرراتو له مخې، که یو خبریال د پاکستان د «ایدیولوژۍ، حاکمیت، امنیت یا عامه نظم» پر ضد اقدام وکړي، د هغه خبري جواز لغوه کېدای شي. منتقدان وایي، دا اصطلاحات مبهم دي او د چارواکو له خوا په بېلابېلو ډولونو تعبیرېدای شي.
د یادونې وړ ده چې پاکستان د رسنیو د ازادۍ په نړیوال شاخص کې د ۱۸۰ هېوادونو له ډلې ۱۵۳م ځای لري.
په همدې حال کې، د نړیوالو رسنیو یو شمېر خبریالان او د پاکستان د خبریالانو د سراسري اتحادیې مشران هڅه کوي چې د خپلو اندېښنو د شریکولو لپاره د دغه هېواد د اطلاعاتو له وزیر سره وګوري.