تاند – د امریکا د کینټاکي ایالت یو اوسیدونکی، چې د زړه له دریدو وروسته ډاکټرانو د هغه دماغي مړینه اعلان کړې وه، د بدن د غړیو د اهدا د عملیاتو په ترڅ کې ژوندی شو.
د کینټاکي ایالت د ځینو رسنیو د راپور له مخې، د دې کس چې نوم یې آنتوني توماس هوور بلل شوی، قضیه د ایالتي او فدرالي چارواکو له خوا تر اوږدې مودې وروسته څېړل کېږي.
د امریکا د بدن د غړو د اهدا سیسټم چارواکي ټینګار کوي چې د داسې پېښو د مخنیوي لپاره حفاظتي تدابیر موجود دي، خو د هغه کس، چې د عملیاتو پر مهال په هوښ راغلی یا ژوندی شوی، د کورنیو غړیو رسنیو ته وویل چې دې پېښې وښوده چې لږ تر لږه په ځینو برخو کې اصلاحات اړین دي.
د آنتوني توماس هوور خور وايي چې څنګه یې ورور د ۲۰۲۱ کال د اکتوبر په میاشتې کې د مخدره موادو د زیاتې استفادې له امله د ریچمنډ په باپټیسټ روغتون کې داخل شو.
ډاکټرانو هغه ورځ کورنۍ ته وویل چې آنتوني هېڅ انعکاس یا دماغي فعالیت نه لري او په پای کې پرېکړه وشوه چې هغه د حیاتي تجهیزاتو له سیسټم څخه جلا کړي. د راپورونو له مخې، د باپټیسټ روغتون کارکوونکو بیا د آنتوني کورنۍ ته وویل چې هغه مخکې دا اجازه ورکړې وه چې د مرګ په صورت کې دې د بدن غړي اهدا شي.
د هغه د غوښتنې د درناوي لپاره، روغتون د هغه پر بدن ازموینې ترسره کړې ترڅو معلومه کړي چې کوم غړي د اهدا لپاره مناسب دي. حتا روغتون د هغه لپاره د درناوي مراسم هم جوړ کړل.
د آنتوني خور وايي، په هماغه وخت کې یې ولیدل چې د ورور سترګې یې خلاصې شوې او داسې معلومېده چې د خپلو عزیزانو حرکات تعقیبوي. هغې رسنیو ته وویل:
“موږ ته وویل شول چې دا یوازې طبیعي عکسالعملونه دي او کومه ځانګړې خبره نه ده.”
شاوخوا یو ساعت وروسته چې هوور د بدن د غړو د اخیستلو عملیاتو لپاره عملیات خونې ته ولېږدول شو، یو ډاکټر بهر راغی او څرګنده یې کړه چې “هغه لا چمتو نه دی.”
د آنتوني خور وویل:
“هغه په حقیقت کې بیدار شوی و” خو دوی موږ ته وویل چې د بدن د غړو د اهدا شرایط یې نه درلودل.