تاند (یکشنبه، د عقرب ۲۷ مه) باختر دولتي خبري اژانس نن (د یکشنبې ورځ، د عقرب ۲۷مه) خبر ورکړ چې چین افچین شرکت د آمو سیند په حوزې کې د تېلو د ۱۸ نوو څاګانو کیندنه پیل کړې ده.
دا څاګانې د قشقري، اقدریا (د سرپل ولایت)، او زمردسای (د جوزجان ولایت) په بلاکونو کې موقعیت لري.
باختر خبري آژانس د افچین شرکت د چارواکو په فول راپور ورکړ چې دې شرکت د آمو سیند په حوزه کې د تېلو څاګانو د کیندنې کار پیل کړی دی.
د افچین شرکت د عامه اړیکو مسوول، امرالدین علیزي، ویلي چې د نوو څاګانو کیندنه به تر ۲۰۲۵ میلادي کال پورې پای ته ورسېږي.
هغه زیاته کړه چې د دې څاګانو له بشپړېدو سره به د نفتو استخراج په پراخه کچه زیات شي.
د طالبانو چارواکي وايي چې د نوو څاګانو کیندنه به هر کال شاوخوا ۵۰۰ میلیون ډالره عواید حکومت ته ورکړي.
طالبان، چې د نړیوالې ټولنې له سیاسي او اقتصادي بندیزونو سره مخامخ دي، په تېرو دریو کلونو کې هڅه کړې چې د افغانستان د کانونو په استخراج سره د کورنیو او بهرنیو شرکتونو له لارې خپل داخلي عواید زیات کړي.