تاند (پنجشنبه، د عقرب ۳ مه) د طالبانو د کرنې، اوبو لګولو او مالدارۍ وزارت وايي، افغانستان په دې کال کې تر دې دمه له کندهاره ۶ زره ۳۶۸ ټنه سره بانجڼ صادر کړي دي.
د وزارت نن په یوه بیان کې ویلي چې تر ټولو ډېر رومي بانجڼ یې پاکستان ته صادر کړي دي.
د روان لمریز کال په لومړیو شپږو میاشتو کې د کندهار د رومي بانجڼو د صادراتو اندازه د تېر کال د همدې مودې پرتله ۲.۹۴ سلنه زیاته ده.
پر دې سربېره کندهار سږ کال ۲۳ زره ټنه انګور، ۷ زره ټنه انځر او ۹ زره ټنه پیاز او ۶۱ کیلو زعفران بهر ته صادر کړي دي.
دا په داسې حال کې ده چې افغان سوداګر د لارو د بندېدو او د ګمرکي تعرفې د زیاتېدو په شمول د مالونو په صادراتو کې له ډېرو خنډونو سره مخامخ دي.