تاند (جمعه، د میزان ۲۷ مه) د اوکلاهوما یوه قاضي د هغه افغان تبعه خوشي کولو غوښتنه رد کړه چې په دې ایالت کې اوسېده او د امریکا د انتخاباتو په ورځ د تروریستي برید په پلانولو تورن شوی و.
قاضی پرېکړه وکړه چې محکمې ته د نصیر احمد توحیدي د وړاندې محاکمې دلایل شته.
د “کوکو (Koco) نیوز ۵” د راپور له مخې، ۲۷ کلن توحیدي یوې ترهګرې ډلې ته د امکاناتو د چمتو کولو او د ترهګریز برید لپاره د وسلو د ترلاسه کولو په دسیسې کې د لاس لرلو په تور نیول شوی دی.
د امریکا فدرالي تحقیقاتي ادارې یا ایف بي ای ویلي چې توحیدي د خپلو پلانونو په جوړولو کې له داعش سره په تماس کې و.
توحیدي په ۲۰۲۱ کال کې له افغانستان څخه د امریکا له وتلو وروسته د سپتمبر په میاشت کې امریکا ته راغی. هغه مخکې په خپل هېواد کې د سي ای اې لپاره د امنیت ساتونکي په توګه کار کړی و او د دې دندې لپاره څارل شوی و. هغه لږ تر لږه یو ځل بیا اوکلاهوما ته تر لېږدولو مخکې معاینه شوی و.