تاند ( پنچ شنبه د میزان ۲۶مه) د پاکستان سیمهییزو رسنیو خبر ورکړی، چې د پاکستان- افغانستان لویه لار له ۶۵ ورځو تړل کېدو وروسته د تورخم له لارې په بشپړه توګه د ترافیکو پر مخ پرانیستل شوه.
د رسنیو په راپورونو کې راغلي، چې دغه لویه لار د خیبر پښتونخوا د اعلی وزیر علي امین ګنډاپور او د اعتراض کوونکیو ترمنځ له بریالۍ خبرو وروسته پرانیستل شوه.
دا په داسې حال کې ده، چې دغه لویه لار په خیبر پښتونخوا کې د پاکستاني پوځ د عملیاتو له کبله د بې ځایه شویو خلکو له اعتراضونو وروسته تړل شوې وه.
بل لورته بیا په ننګرهار کې د پاک-افغان د سوداګرۍ خونو سلاکار مخلص احمد رسنیو ته ویلي، چې له دې سره به د افغان سوداګرو د صادراتو او افغانستان ته د وارداتو ستونزه حل شي.
په خیبر دره کې د دوشنبې په ورځ د پښتنو قامي جرګې په پرېکړو کې یوه هم دا وه چې له افغانستان سره دې د ډیورنډ کرښې په اوږدو ټولې لارې د خلکو او مالونو پرمخ خلاصې شي.