تاند ( جمعه د میزان ۲۰مه) د پاکستان پلازمېنه اسلام اباد کې د قایداعظم پوهنتون د زده کوونکو ترمنځ په نښته کې ۵ زده کوونکي ژوبل شوي دي.
د پوهنتون یو چارواکي د نوم پټ ساتلو په شرط رسنیو ته ویلي، چې هغه نښته د اکتوبر ۱۰مې په ماښام د زده کوونکو د دوه ټولنو پښتنو او پنجابي زده کوونکو ترمنځ شوې ده.
تر نښتې وروسته پر ټولنیزو رسنیو په خپرو شویو ویډیوګانو کې ښکاري چې ځینې کسان هوایي ډزې کوي.
د اسلام اباد د پیمز روغتون یو چارواکي رضوان الله رسنیو ته ویلي، چې دوی ته ځینې ژوبل زده کوونکي وروړل شوي او درملنه یې روانه ده.
قاید اعظم پوهنتون د پاکستان له لویو پوهنتونونو بلل کېږي چې پکې تر دې مخکې هم د زده کوونکو ترمنځ په بېلابېلو نومونو جګړې شوې دي.
د قاید اعظم پوهنتون انتظامیې تر نښتې وروسته په یوه خبرپانه کې ویلي سر له ننه (د اکتوبر له۱۱مې) بيا د اکتوبر تر ۲۰مې د لیلیو تړلو اعلان کړی دی.