تاند (شنبه د میزان ۱۴مه) د طالبانو د حکومت د تدارکاتو په ملي کمېسیون کې د حيرتان- مزارشريف د رېللارې د بیارغونې او غير رېلي تاسیساتو پروژو قراردادونه منظور شول.
د طالبانو د ریاست الوزرا اقتصادي معاونیت ویلي، د دې پروژو د منظورۍ تر څنګ د ۱۱ نورو پروژو قراردادونه منظور او د ۱۵ نورو پروژو قراردادونه تعدیل شوي دي.
د طالبانو اقتصادي معاونیت د دغو پروژو ټول لګښت لس ميليارده افغانۍ اټکل کړى.
په دغو پروژو کې د کندهار، زابل او نیمروز پوهنتونونو د لیلیې د پاتې کارونو بشپړول، د کندهار د نړېوال هوايي ډګر بیارغونه، فاریاب ولایت کې د ۲۵ کیلومتره سړک اساسي جوړول او یو شمېر نورې پروژې شامل دي.