تاند- که څه هم د متحدو ایالتونو ولسمشر د لوېدیځې نړۍ مشر بلل کیږي، خو هغه بیا هم د فدرالي دولت کارمند دی او په متحدو ایالتونو کې د نورو کارمندانو په څیر معاش اخلي. د هغه معاش د ډیری خلکو پرتله لوړ دی خو دومره هم نه دی چې ښايي موږ او تاسو یې فکر کوو. البته د امریکا ولسمشر د معاش ترڅنګ ځیني امتیازونه لري لکه وړیا کور، خواړه، د سفر لګښت، او وړیا امنیت.
د امریکا ولسمشر ته څومره پیسې ورکول کیږي او د دې چوکۍ د خاوند معاش په تیرو کلونو کې څومره کم یا زیات شوی دی؟ هغه په نړۍ کې د نورو ولسمشرانو پرتله څومره معاش لري؟
د امریکا ولسمشر څومره معاش اخلي؟
که څه هم د متحدوایالتونو د ولسمشر معاش د نورو دولتي کارمندانو پرتله لوړ دی، خو په هیڅ ډول د ګوګل او مایکروسافټ په څیر د ټکنالوژۍ د لویو شرکتونو د اجرايي رییسانو له ملیون ډالري معاشونو سره پرتله کیدی نه شي.
د امریکا د ولسمشر معاش اوس په کال کې ۴۰۰ زره ډالره دی. د متحدو ایالتونو کانګرس دا اندازه په ۲۰۰۱ کې تصویب کړه.
تر دې مخکې د امریکا د ولسمشر معاش د دېرشو کلونو لپاره په کال کې ۲۰۰ زره ډالره وو. د امریکا ولسمشر ته معاش په دې خاطر لوړ ټاکل شوی و چې د امریکا د ولسمشر چوکۍ ته درناوی وشي ځکه چې د ده چوکۍ د نړۍ د موجودو چارواکو په منځ کې تر ټولو د ستر مقام چوکۍ ده.
خو له دې سره سره د امریکا د ولسمشر معاش د نړۍ د سیاسي مشرانو په منځ کې تر ټولو لوړ نه دی. د سینګاپور صدراعظم په کال کې د 1.61 میلیون ډالرو معادل معاش ترلاسه کوي. د هانګ کانګ اجرايي رییس په کال کې د ۶۹۵ زره ډالره معاش په ترلاسه کولو په دوهم ځای کې دی، او د سویس ولسمشر د ۵۳۰ زره یورو معادل معاش په ترلاسه کولو دریم دی. د امریکا ولسمشر په دې درجه بندۍ کې څلورم ځای لري.
د امریکا د ولسمشر تقاعد څومره دی؟
د “پخواني ولسمشر” په نوم د قانون له مخې، د متحدو ایالتونو ولسمشر حتي د دفتر له پریښودو وروسته د فدرالي حکومت د معاشونو په فهرست کې پاتې کیږي او د کابینې له وزیر سره مساوي تقاعد ترلاسه کوي.
د NBC نیوز له راپور سره سم، د متحدو ایالتونو پخواني ولسمشر ډونالډ ټرمپ په کال کې ۲۳۰ زره ډالره تقاعد ترلاسه کوي.
د امریکا مرستیال ولسمشر ته څومره پیسې ورکول کیږي؟
څرنګه چې د مرستیال ولسمشر معاش په اساسي قانون کې مشخص شوی نه دی او د مالیې په قوانینو کې هم ورته دقیقه اندازه ټاکل شوئ نه ده، د هغه معاش د ژوند لګښتونو ته په کتو بدلیږي.
اوس مهال د متحدو ایالتونو د مرستیال ولسمشر معاش په کال کې ۲۳۵ زره ۱۰۰ ډالره ده.
سرچینه: یورو نیوز تلویزیون