تاند(یکشنبه، د سنبلې ۲۵ مه) د متحدوایالتونو د استازو جرګې د طالبانو د مخالفانو د ملاتړ او د طالبانو د واکمنې ادارې پرضد د یوې ګډې جبهې د جوړولو د هڅو د ملاتړ د پرېکړه لیک د تصویب اعلان وکړ.
د متحدو ایالتونو د استازو جرګې د بهرنیو اړیکو کمیټې مرستیال تیموتی بروچټ وویل چې ۱۴۳۳ پریکړه لیک په افغانستان کې د طالبانو د مخالفانو د ملاتړ لپاره تصویب شو.
په دغه پریکړه لیک کې د افغانستان واکمنه اداره د یوې ترهګرې ډلې په نوم یاده شوې او ټینګار کوي چې د متحدو ایالتونو د استازو جرګه د ویانا د غونډې د طالبانو د سیاسي مخالفانو د بهیر په توګه ملاتړ کوي.
په دغه پریکړه لیک کې زیاته شوې ده چې متحدایالتونه باید په افغانستان کې د ډیموکراتیکې حکومتولۍ او بشري حقونو د ودې او همدارنګه د هغو کسانو ملاتړ وکړي چې د طالبانو د استبدادی واکمنۍ مخالف دی.
دغه پریکړه لیک د ویانا پروسه د ټولشموله سیاسی خبرو لپاره یو پلیټ فارم بللی چې د طالبانو د ټولو مخالفو ډلو لپاره د هیلې د څراغ په توګه کار کوۍ او د کابل حکومت پر وړاندې ګډه جبهه پیاوړې کوي.
د امریکا د استازو جرګې همداراز د خپل هیواد له حکومته غوښتي چې د وینا په پروسه کې فعاله برخه واخلي او ملاتړ یې وکړي.
د ویانا کنفرانس لومړۍ ناسته د طالبانو ضد شخصیتونو په نوښت واک ته د طالبانو له رسیدو وروسته د اتریش په ویانا ښار کې جوړه شوه او څلورم پړاو یې د روان کال په جولای کې ترسره شو.
د دغو غونډو موخه دا ده چې د اپوزیسیون ډلو لپاره یو پلیټ فارم برابر کړي چې د افغانستان د راتلونکی لپاره د لارې په نقشه بحث وکړي، د طالبانو پر وړاندې یو متحد دریځ رامنځته کړي او نړیوال ملاتړ ترلاسه کړي، خو تر دې دمه کومه څرګنده بریا یې نه ده لرلې.