تاند ( شنبه ـ د سنبلې ۲۴مه) پاکستان د افغانستان لپاره خپل ځانګړی استازی آصف علي درانی له دندې ګوښه کړ.
ډان ورځپاڼې په یوه راپور کې ویلي چې،پاکستان نوموړی د افغانستان په اړه د اسلام اباد له سیاست سره د اختلاف په غبرګون کې له دندې ګوښه کړ.
د دې راپور پر اساس نوموړی د تېرې سې شنبې په ورځ له دندې ګوښه شوی دی.
دراني د ۲۰۲۳ کال د می په میاشت کې د افغانستان د ځانګړي استازي په حیث وټاکل شو چې وکولی شي د اسلام اباد او کابل ترمنځ روان کړکیچ حل کړي.
د دواړو هېوادونو ترمنځ اړیکې په پاکستان کې د بریدونو د زیاتوالي له امله کړکیچنې شوي. پاکستاني چارواکي ادعا کوي چې دا بریدونه په افغانستان کې سازماندهي کېږي خو د طالبانو حکومت بیا دا ادعاوې بې اساسه بولي او وایي افغانستان د پاکستان د نا امنۍ مسوول نه دی.
په ورته مهال د افغان سولې په برخه کې د امریکا پخواني ځانګړي استازي زلمي خلیلزاد پر خپله اېکس پاڼه د پوښتنې په توګه لیکلي چې، د افغانستان لپاره د پاکستان ځانګړي استازي اصف علي دراني له دندې د ګوښه کېدو لامل څه دی؟
خلیلزاد زیاته کړې چې لا په ډاګه نه ده چې نوموړی به د جنرال عاصم منیر له کومې سرې کرښې تېر شوی وي.
خو ډان ورځپاڼې بیا لیکلي چې چې آصف علي درانی پر افغان کډوالو د ویزې لازمي کېدو پلوی وو او په ډله ییز ډول له اسنادو پرته د افغان کډوالو د ویستلو مخالف وو.
د یادې ورځپاڼې د راپور له مخې درانی په دې باور وو چې پاکستان باید د تروریزم برخه کې خپله ستونزه په خپله خاوره کې حل کړي.