تاند ( شنبه ـ د سنبلې ۲۴مه) د افغانستان د صنعت او سوداګرۍ وزارت وایي د روان ۱۴۰۳ هجري لمریز کال په لومړیو پنځو میاشتو کې یې له منځۍ آسیا هېوادونو سره د ۶۸۴ ملیونه ډالرو په ارزښت راکړه ورکړه کړې ده.
د طالبانو د صنعت او سوداګرۍ وزارت ویاند عبدالسلام جواد وایي، په یاده اندازه سوداګرۍ کې صادرات او واردات دواړه ترسره شوي دي.
د نوموړي په وینا په دې شمېره کې ۶۰ ملیونه صادرات ترسره او ۶۲۴ ملیونه یې واردات دي چې په تېرو پنځو میاشتو کې د منځني آسیا له هېوادونو سره شوې دي.
د کرنیزو پوهانو په باور افغانستان یو کرنیز هیواد دی او ډېری صادراتي توکي یې کرنیز محصولات دي.
دوی وایي که د افغانستان صنعتي تولیداتو ته بازار موندنه زیاته شي نو د وارداتو په نسبت به د صادراتو کچه ډېره شي هغه څه چې اقتصاد پوهان یې د هېواد لپاره ګټور بولي.
د صنعت او سوداګرۍ وزارت د شمېرو له مخې افغانستان په کال کې کابو ۱۰ ملیارده ډالره راکړه ورکړه لري چې له دې ډلې یې ۲ ملیارده ډالره صادرات او ۸ ملیارده ډالر یې واردات دي.