تاند (دوشنبه، د اسد ۲۲ مه) د ملګرو ملتونو د نفوسو ادارې د ځوانانو د نړیوالې ورځې په مناسبت ویلي چې د افغانستان ۶۳ سلنه وګړي تر ۲۵ کلونو کشران دي.
دې ادارې ټینګار کړی چې د دوی په مشارکت به بشري او پرمختیايي هڅې لا ډېرې اغېزمنې او دوامداره شي.
ملګري ملتونه اټکل کوي چې په ۲۰۲۱ کال کې د طالبانو له واک ته رسېدو وروسته تر۵۰۰ زرو ډېر کسان بېکاره شوي دي.
د طالبانو تر کنټرول لاندې د افغانستان د احصایې ادارې تېره اوونۍ (چهارشنبه، د اسد ۱۷ مه) د افغانستان نفوس ۳۵ میلیونه او ۸۰۰ زره وښود او ویې ویل چې له دې منځه ۱۸ میلیونه نارینه او څه باندې ۱۷ میلیونه ښځې دي.
خو ملګرو ملتونو د افغانستان نفوس شاوخوا ۴۳ میلیونه اټکل کړی دی.
د ملګرو ملتونو د شمېرو له مخې د دغه هېواد ۴۳ سلنه وګړي تر ۱۴ کلونو کم عمر لري او ۵۵ سلنه یې د ۱۵ او ۶۴ کلونو ترمنځ عمرونه لري، یعنې د کار عمر لري او د هېواد یوازې ۲ سلنه وګړي له ۶۵ کلونو پورته عمر لري.
د ملګرو ملتونو د نفوسو صندوق هم اټکل کړی چې د افغانانو د عمر اوسط یا عمر ته امېد ۶۲ کاله او د ښځو ۶۸ کاله دی.
د احصایې د ادارې پر اساس، ۹ میلیونه او ۲۰۰ زره افغانان په ښارونو او ۱۵ میلیونه په کلیو کې اوسي. همداراز یو نیم میلیون کوچیان دي.
افغانستان یو له هغو هیوادونو څخه دی چې د نفوس وده یې ډطره چټکه ده.
دا داسې حال کې ده چې په افغانستان کې څه باندې ۲۰ میلیون وګړي د لوږې له بحران سره مخامخ دي.