تاند (دوشنبه، د اسد ۲۲ مه) په ملګروملتو کې د پاکستان استازی منیر اکرم وايي، د افغان طالبانو ترمنځ داخلي اختلافات سبب شوي چې هغوی د ټي ټي پي پرضد جدي اقدام ونه کړي.
د ایکسپریس تریبیون ورځپاڼې د راپور له مخې، اکرم وویل هیواد یې هڅه کوي چې د پاکستاني طالبانو په اړه د افغان طالبانو پالیسي بدله کړي.
ورځپاڼې نن د اکرم له قوله همداراز ویلي چې پاکستان په دوه اړخیزه، سیمه ییزه او نړیواله سویه د دیپلوماسۍ له لارې د ټي ټي پي په اړه د افغان طالبانود پالیسۍ د بدلولو هڅه کوي.
په ملګروملتو کې د پاکستان دایمي استازې همداراز دا نظر رد کړ چې ګنې پاکستان د افغان طالبانو دریځونه نه شی بدلولی، ویې ویل:«دا ستاسو باور دی چې د موږ د طالبانو دریځ بدلولی نه شو. موږ دغسي باور نه لرو. که طالبان وي یا هر بل څوک، هر حکومت هڅه کوي چې خپله پالیسي د دیپلوماسۍ له لارې بدله کړي او دا هڅه روانه ده.»
منير اکرم زياته کړه، اسلام اباد د دغه ګام د پورته کولو لپاره ډېرې هڅې کړي، خو د طالبانو د حکومت خپلمنځي اختلافات د دې سبب شوي، چې افغان طالبان د پاکستاني طالبانو پر ضد جدي ګامونه پورته نه کړي.
په ملګروملتو کې د پاکستان استازي د خپلو خبرو په دوام کې وویل: «موږ هڅه کوو چې طالبان قانع کړو چې د دوی شتون (په افغانستان کې د پاکستاني طالبانو تحریک) د پاکستان، سیمې او حتی په خپله د طالبانو په تاوان دی.»
نوموړي دغه راز په افغانستان کې د ترهګرۍ پر وړاندې د مبارزې لپاره د نړیوالې اجماع غوښتنه وکړه.
د پاکستان استازي دا هم وویل چې په راتلونکي کې د طالبانو د حکومت په رسمیت پیژندل او پر هغوی د بندیزونو لرې کول د ترهګرۍ پر وړاندې د طالبانو د حکومت له اقداماتو پورې سره تړلی دی.
د افغانستان د طالبانو حکومت د ټي ټي پي د ملاتړ او یا د ټي ټي پي له لوري د جګړې لپاره دافغانستان له خاورې د کار اخیستلو ادعاوې رد کړي او ویلي یې دي چې دوی هیچا ته اجازه نه ورکوي چې د افغانستان خاوره د بل هیواد پر ضد وکاروي.
طالبان په عین حال کې وايي چې پاکستان باید خپلې ستونزې په خپله خاوره کې دننه حل کړي.
کثیفیستان چې دا پنځوس کاله د افغانستان پرضد څه وکړل ، څومره بدبخته ، منحوسې څهرې یې د افغانستان د ورانۍ لپاره وروزلې ، څومره مضر او وطندښمنه عناصرو ملاتړیې وکړ، ټول د دوی لپاره ښه وو. « جنګ افغانستان ، د فاع کثیفیستان » ، ټالب همارا هیروهې . دا خو هیچا محکوم نه کړل .
ضیاالباطل یې د مجاهدینو د کامیابۍ په هیله د کابل په پلخشتي جومات کې د لمانځه اداکولو خوبونه له ځان سره دوزخ تو یووړل . جنرال اختر ، جنرال حمید ګل ، جنرال فیض حمید یې د خپلولاسپوڅو پوځي مشاورین نه وو ټاکلي ؟