تاند (دوشنبه، د اسد ۲۲ مه) داعش ډلې د کابل ښار په لویدیځه برخه کې د سپرلیو پر موټر د پروني بمي برید مسوولیت ومانه.
داعش ډلې د کابل په دشت برچي سیمه کې د ټیلو ټانک په ساحه کې په مني بس کې له چاودنې څو ساعته وروسته په خپل ټلګرام چاینل کې په یوه بیان کې د دې برید مسوولیت په غاړه واخیست.
تر دې مخکې په کابل کې د طالبانو د پولیسو د قوماندانۍ ویاند خالد ځدران ویلی و چې په چاودنه کې لږ تر لږه یو کس وژل شوی او ۱۱ نور ټپیان شو دي.
د پېښې ځینې شاهدان وايي چې په دې پېښه کې، چې په یوه مرسدس مني بس کې د مقناطیسي بم د چاودنې په پایله کې وشوه، د مرګ ژوبلو شمېر تر هغه څه ډېر دی چې د کابل د امنیه قوماندانۍ ویاند یې ښيي.
داعش ډلې سږ کال په کوټه سنګي او دشت برچی کې د دوو نورو بمي بریدونو مسوولیت هم په غاړه اخیستی دی.
خو په مجموع کې د تېرو کلونو برتله په افغانستان کې د داعش بریدونه کم شوي دي.