تاند (دوشنبه، د اسد ۲۲ مه) د طالبانو دفاع وزارت وايي جې دوې له کاره لوېدلې الوتکې یې له ترمیم کولو وروسته الوت ته چمتو کړي دي.
دفاع وزارت نن په یوه خبرپاڼه کې ویلي یوه الوتکه او یوه څرخکه د دغه وزارت تخنیکي ټیم ترمیم کړي دي او د الوت په مراسمو کې یې دفاع وزیر مولوي محمدیعقوب مجاهد ګډون کړی و.
د دفاع وزارت په خبرپاڼه کې د الوتکې د ډول په اړه څه نه دي ویل شوي خو څرخکه یې ایم ډي – ۵۴۰ ښودلې ده.
تر دې وړاندې هم د طالبانو دفاع وزارت د یو شمېر الوتکو د ترمیم او الوت ته د چمتو کولو خبرونه ورکړي دي.