تاند (پنجشنبه، د اسد ۱۸مه) د ایران حکومت د چهارشنبې په ورځ د څلورو افغان اتباعو په ګډون لږ تر لږه ۲۰ کسان اعدام کړل.
د ایران د بشري حقونو یوې څارونکې ادارې، هه نګاو راپور ورکړ چې اعدام شوي کسان د مخدره موادو، پلان شویو وژنو، او جنسی تیریو په تور محکوم شوي وو. دغه اعدامونه د کرج په قزل حصار زندان کې وشول.
د هه نګاو د معلوماتو پر اساس، د دغو کسانو په منځ کې څلور افغانان و چې درې یې د جنسي تیري او یو د پلان شوي قتل په تور محکوم شوی و.
هه نګاو ویلي چې د اعدام شویو کسانو له ډلې څخه یې ۱۱ تنه پېژندلي دي.
د ایران د قضایی چارو یوه چارواکي کاظم غریب ابادي په دې وروستیو کې وویل چې په ایران کې نژدې ۹۰ سلنه بهرنی بندیان افغان اتباع دي.
تر دې مخکې ههنګاو ویلي و چې د سږ کال په تېرو اوو میاشتو کې لږ تر لږه ۲۵ افغان بندیان د ایران په زندانونو کې اعدام شوي دي.
د روانې اوونۍ د یکشنبې په ورځ (د اګست ۴ مه) په ناروې کې دېره د ایران د بشري حقونو سازمان ویلي و چې ایران په تېرو اوو میاشتو کې شل تنه افغانان په بېلابېلو تورونو اعدام کړي دي.
دغه سازمان ویلي چې په دې موده کې لږ تر لږه ۳۰۰ کسان د ایران په زندانونو کې اعدام شوي دي.
په دوی کې ۱۵ ښځې، ۴۲ بلوڅان، ۲۰ کردان او ۲۰ افغان اتباع وو.
راپور ښیې چې له ۳۰۰ اعدامونو څخه ۱۷۲ یې د مخدره توکو په جرمونو پورې تړاو لري.