د افغانستان کرکټ بورډ ادارې د ملي لوبډلې پخوانی لوبغاړی احسان جنت په لوبو کې د فیکسنګ یا جوړجاړي له کبله پنځه کاله په سیالیو کې له ګډون کولو منع کړ.
کرکټ بورډ نن (چهارشنبې، د اګست په ۷مه) په یوه خبرپاڼه کې ویلي، احسان جنت د کابل د غوره لیګ یا پریمیرلیګ په دوهم پړاو کې په لوبو کې فساد یا میچ فیکسینګ کړی دی چې له امله یې پنځه کلن بندیز پرې لګول شوی دی.
د کرکټ بورډ زیاتوي:«د لوبو د فساد ضد نړیوال قانون د ۲مې مادې، د لومړۍ فقرې د لومړي جز پر بنسټ، کوم لوبغاړي چې د فساد په کړنو، جوړجاړي او ورته نورو مواردو کې ښکېلیږي نو له پنځه کلونو تر عمري لوبیز بندیز سره مخ کیدای شي، چې د نوموړي سرغړونې او حالاتو ته په پام سره هغه ته پنځه کلن لوبیز بندیز په پام کې نیول شوی دی.»
خبرپاڼه زیاتوي، پر دوو نورو لوبغاړو هم د فساد شکونه شته، خو لا یې په اړه نهايي پرېکړه نه ده اعلان شوې.
احسان جنت د ملي لوبډلې د پخواني لوبډلمشر نوروز منګل ورور دی او تر دې دمه یې د افغانستان د ملي لوبډلې په چوکاټ کې ۳ ټېسټ، ۱۶ یو ورځنۍ او یوه شل اوریزه سیالۍ کړې ده چې ټولټال منډې یې ۴۳۷ دي.
د ویلو ده چې په لوبو کې د فساد یا میچ فیسکینګ له امله د افغانستان یو بل ملي لوبغاړی شفیق الله شفق له شپږ کلن لوبیز بندیز سره مخ دی.