تاند ( جمعه ، د اسد ۱۲ مه) د ملګرو ملتونو علمي او فرهنګي سازمان یونیسکو ویلي، چې د افغان نجونو د زده کړو د اندېښمن وضعیت په اړه راتلونکې اوونۍ ځانګړې غونډه کوي.
د دغه سازمان په اعلامیه کې راغلي، چې یاده غونډه به د راتلونکې پنجشنبې په ورځ په انلاین بڼه ترسره شي.
سرچینې ویلي، چې په دې غونډه کې به د افغانستان یو شمېر مدني فعالان هم برخه ولري.
د ملګروملتونو دغه سازمان د طالبانو د واکمن رژیم لخوا د نجونو پر زده کړو بندیزونه د اندېښنې وړ ګڼلي او ویلي، چې دا وضعیت باید بدل شي.
د طالبانو له بیا واک ته رسېدو سره دغې ډلې افغان نجونې له شپږم ټولګي څخه له پورته زده کړو محرومې کړې دي.
پر دغه وضعیت افغان نجونو او فعالانو بیا- بیا اعتراضونه کړي، چې نړیوالو هم بدرګه کړي خو عملاً د دې وضعیت د بدلون لپاره کوم جدي فشار پر طالبانو نه دی راوستل شوی
د طالبانو یو شمېر منتقدان باور لري، چې نړیواله ټولنه په دې او نورو برخوکې طالبانو سره د خپلو جیوپولیټیکي موخو په اساس چلند کوي او په افغانستان کې ناوړه وضعیت او د حقونو پراخ نقض ورته مهم نه دی.