تاند (پنجشنبه، د اسد ۱۱ مه) د طالبانو د اقتصاد وزارت مسلکي معین ډاکټر عبداللطیف نظري ادعا لري چې د دوی رژیم د بې کارۍ د ختمولو هڅې کوي.

د اقتصاد وزارت ویاند عبدالرحمن حبیب بیا وایي اوسمهال په افغانستان کې دوه زره ۴۷۷ مؤسسې فعالیت کوي چې دوه زره ۱۹۹يې کورنۍ او ۲۷۸ يې بهرنۍ دي.

هغه زیاته کړه چې په تېر یوه کال کې د هېواد په کچه، د غير دولتي کورنیو او بهرنيو مؤسسو له لوري، دوه زره ۱۹۴ بشري او پراختيايي پروژې پلې شوې، چې په بهیر کې يې شاوخوا ۲۰۰ زره کسانو ته د کار زمينه برابره شوې ده.

د حبیب په وینا، په یاده موده کې ۱۵۹ غیردولتي داخلي او ۱۴ بهرنۍ مؤسسې نوې په اقتصاد وزارت کې ثبت شوې؛ د ۳۱۵ داخلي او ۶۰ بهرنیو مؤسسو د فعالیت جوازونه تمدید شوي او د ۲۴ میلیونه ډالرو په ارزښت، ۱۰۴۷ کورنیو او بهرنیو مؤسسو ته ګمرکي معافیت ورکړل شوي دي.

دا په داسې حال کې ده، چې د طالبانو رژیم پر موسسو د افراطي قیوداتو په لګولو او پرې د خپلو سلیقو او افرادو د ګومارلو په تحمیلولو تورنیږي.