تاند (یکشنبه، د سرطان ۳۱ مه) د داعش ډلې خراسان څانګې د پاکستان د بلوچستان کوټې ته په یوه نږدې سیمه کې د دوی خلاف د جاسوسۍ په تور د یوه کس د اعدام خبر ورکړی.
یادې ډلې د دغه کس د هویت او نورو جزیاتو په تړاو څه نه دي ویلي، خو د اعدام اړوند عکسونه یې خپاره کړي.
داعش ډلې مخکې د پښتونخوا په یو شمېر سیمو کې هم د ورته پېښو خبرونه ورکړي.
پاکستاني چارواکو په دې اړه څه نه دي ویلي.
تېره اوونۍ په افغانستان کې د طالبانو د واکمن رژیم د بهرنیو چارو وزیر ملا امیرخان متقي د پاکستان له مشخص نوم اخیستو پرته وویل، چې د داعش ډلې پټنځایونه د سیمې په یوه هېواد کې دي.
تر دې مخکې د طالبانو د استخباراتو اړوندې المرصاد رسنۍ هم پاکستان له داعش ډلې څخه په ملاتړ تورن کړی و.
یو شمېر افغان شنونکي هم باور لري، چې پاکستان د کابل پر واکمن رژیم د فشار راوړلو او ننګولو لپاره یې د داعش ډلې په نوم جنګیالي پیاوړي کوي او افغانستان ته استوي.