تاند (شنبه، د سرطان ۳۰مه) په پاکستان کې د افغانستان د سفارت لپاره د طالبانو د رژیم سرپرست سردار احمد شکېب وايي، د بنو د پېښې په اړه د پاکستان د بهرنیو چارو وزارت پیغام یې کابل کې خپلو چارواکو ته لېږلی دی.
شکېب له افغان خاورې د ترهګریز ګواښ په تړاو هر ډول ادعا ردوي او زیاتوي، د بنو پېښه له افغانستان سره هېڅ اړیکه نه لري.
سردار احمد شکیب و ویل: بنو کې چې کومه پېښه رامنځته شوې وه، کومه حمله شوې وه، د هغه په تړاو د دوی اندېښنه وه چې ګویا دا د افغانستان له اړخه تنظیم شوی دی، د دې په اړه موږ د هغوی پیغام ترلاسه کړی، زموږ یو همکار هلته تللی و او پیغام مو خپل مرکز ته هم استولی دی.
د پاکستان د بهرنیو چارو وزارت ویاندې ممتاز زهرا بلوچ ادعا کړې چې په افغانستان کې د پاکستاني طالبانو د تحریک او نورو ترهګرو ډلو حضور د سېمې د سولې او امنیت لپاره جدي ګواښ شمېرل کیږي.
په قطر کې د طالبانو د رژیم د سیاسي دفتر رییس سهیل شاهین په اسلام آباد کې د دوی د سفارت د مرستیال احضاریدو ته په غبرګون کې ویلي، هر هېواد مکلف دی چې خپل امنیت خوندي کړي.