تاند (پنجشنبه، د سرطان ۲۸ مه) د طالبانو حکومت په درو ولایتونو کې د اته میګا واټه لمریزې برېښنا د تولید قراداد په داسي حال کې لاسلیک کړ چې د اوبو او انرژۍ وزیر یې وايي چې هبت الله اخوندزاده امر کړی چې د کانونو د سپړلو په بدل کې ۲۵۰ میګاواټه برېښنا تولید کړي.
د باختر خبري اژانس د راپور له مخې، د طالبانو د اوبو او انرژۍ وزیر عبدالطیف منصور نن (پنجشنبې) په کابل کې د عوفي بهرام شرکت له مسوول سره د لمریزې برېښنا د تولید د درو پروژو موافقه لاسلیک کړه.
د دې موافقې پر اساس، عوفي بهرام شرکت به په شاوخوا ۲۵ میلیون ډالرو په فراه، روزګان او پکتیکا ولایتونو کې لمریزه انرژي تولید کړي.
د خبر له مخې، دا برېښنا به د فراه، روزګان او پکتیکا د خلکو د اړتیا برېښنا پوره کړي.
د دغو پروژو له بشپړېدو وروسته به اته میګاواټه لمریزه برېښنا تولید او ۵۰۰۰ کورنۍ له برېښنا برخمنې شي. اوسمهال په افغانستان کې شاوخوا ۵۰ میګاواټه لمریزه برېښنا تولیږي.
ښاغلي منصور د قرارداد له لاسلیکولو وروسته وویل چې دا پروژې د ملاهبت الله اخوندزاده له هغه حکم سره تړاو لري چې د کانونو د استخراج په بدل کې یې د ۲۵۰ میګا واټه برېښنا د تولید په برخه کې صادر کړی دی.
ده وویل:«موږ له امیرالمومنین څخه د کانونو د استخراج په بدل کې د ۲۵۰ میګاواټه برېښنا د تولید په اړه حکم اخیستی دی.»
د اوبو او انرژۍ وزیرعبدالطیف منصور همداراز وویل چې قراردادي شرکت په کابل کې هم د ۱۰۰ میګا واتو لمریزې بریښنا د تولید په برخه کې د پانګونې غوښتنه کړې ده.
د عبدالطیف منصور د وینا، اوس افغانستان د اوبو له مختلفو بندونو څخه ۳۰۰ میګا واټه بریښنا تولیدوي. ده وویل چې حکومت یې د ۴۰۰ میګا واټه بریښنا د تولید لپاره چمتووالی لري.
افغانستان اوس مهال ۱۴۰۰ میګاواټه بریښنا لري چې نژدې ۷۰ فیصده یې د خپلو څلورو ګاونډیو هیوادونو اوزبکستان، تاجیکستان، ترکمنستان او ایران څخه واردوي. تر تولو ډېره برېښنا له ازبکستان څخه واردوي.