تاند (جهارشنبه، د سرطان ۲۷ مه) د مالیې وزارت لپاره د طالبانو چارواکو د یوې خبرپاڼې په خپرولو سره ویلي، چې د د هېواد په ګمرکونو کې د افغانستان لاس بې اسناده (یو کیلي) موټرونو د ثبت او محصول پروسه پیل شوه.
دې وزارت زیاته کړې؛ یاده پروسه چې د ۱۴۰۳ ه.ش کال تر وروستیو تمدید شوې، اوسمهال د کابل، هرات، بلخ، ننګرهار، کندهار، کندوز، خوست او پکتیا په ګمرکونو کې په عملي ډول پیل او روانه ده.
د یاد وزارت په وینا؛ د یادو وسایطو د پړاوونو په ترسره کولو کې د چټکتیا په موخه واحد کاري مرکزونه جوړ شوي، چې ټول پړاوونه یې تر یوه چتر لاندې ترسره کېږي.
د مالیې وزارت په دې خبرپاڼه کې ویلي؛ د افغانستان لاس یو کیلي موټرونو د ثبت او محصول په کړنلاره کې د خلکو اقتصادي حالات په پام کې نیول شوي او داسې لارې چارې سنجول شوي، چې مالکین یې وکولی شي خپل موټرونه په اسانۍ محصول کړي.
په خبر پاڼه کې د مالیې وزارت د ګمرګونو لوی ریاست د افغانستان لاس بې اسناده موټرونو له مالکینو څخه غوښتنه کړې، چې له دې زمینې څخه دې ګټه واخلي او خپلو موټرونو ته دې قانوني سندونه جوړ کړي.