تاند( پنجشنبه، د سرطان ۲۸ مه) د طالبانو د کانونو او پټرولیم نوي وزیر هدایت الله بدري د مس عینک د چینايي قراردادي شرکت له مشر سره په کتنه کې له هغه وغوښتل چې د دې پروژې کار ژر تر ژره پیل کړي.
بدري، چې پخوا د افغانستان بانک ريیس و، په وروستیو ورځو کې د شهاب الدین دلاور پر ځای د کانونو او پیترولیم وزیر وګومارل شو.
د چینايي شرکت مشر د چهارشنبې په ورځ (د سرطان ۲۷) له هدایت الله بدري سره په کتنه کې د عینک د مسو د پروژې د پیل لپاره چمتووالی وښود .
د کانونو او پټرولیم وزارت ویاند په یوه بیان کې ویلي چې د عینک د مسو د قراردادي شرکت مشر سونګ وین بینګ په لنډ وخت کې د عینک د سړک د اساسي جوړولو او د دې پروژې د عملي پیل په اړه خپل کاري پلان شریک کړ.
د طالبانو د کانونو وزیر وايي، د عینک د مسو کان د کار د پیل لپاره هر ډول همکارۍ ته چمتو دی.
د افغانستان پخواني حکومت په ۲۰۰۷ کال کې د عینک د مسو کان د استخراج تړون له چینايي شرکت سره لاسلیک کړ، خو د لرغونو اثارو د کیندنې اوږدې پروسې او د کلونو ناامنیو له امله تراوسه د دې پروژې کار نه دی پیل شوی.
تر دې وړاندې د طالبانو د حکومت د کانونو او پیترولیم مخکیني وزیر شهاب الدین دلاور هم په ځلونو له چینايي شرکت څخه د عینک کان د پروژې د پیلولو غوښتنې کړې وې او چینايي لوري یې د پیلولو ژمنې کړې وې خو تراوسه نه د طالبانو حکومت او نه هم چینايي شرکت د کار د نه پیلېدو د دلایلو په اړه څه ویلي دي.
ظاهراً پر افغانستان نړیوال بندیزونه او په افغانستان کې د یوه داسی حکومت نشتوالی چې نړیواله ټولنه یې په رسمیت وپېژني، د عینک مسو کان او ګڼو نورو پروژو د ځنډېدو اصلي عوامل دي.
د ترهګرو سره باید چین هیڅ کاروبار ونکړي دا یوه نه منل شوې غله ډله ده چې هر څه جیب کې اچوي.