تاکایوشي کرومیا وویل: «په ننګرهار، کونړ، لغمان، پنجشیر او کاپیسا کې د وروستیو سختو توپانونو او ویجاړوونکو سیلونو له امله سخت خواشینی شوم. زه د هغو کسانو چې ژوند یې له لاسه ورکړی او د هغوی له کورنیو سره خپله خواخوږي څرګندوم.”
د کډوالو په چارو کې د ملګرو ملتونو لویې کمیشنرۍ د چهارشنبې په ورځ یو راپور خپور کړ چې وايي، په ننګرهار، لغمان او کونړ ولایتونو کې د وروستیو سېلونو له امله ۷۲۷ کورنۍ زیانمنې شوې دي.
طالبان وايي، په ننګرهار ولایت کې د سېلونو او توپانونو له امله لږ تر لږه ۴۰ تنه مړه او لږ تر لږه ۳۴۷ تنه ټپیان شوي دي.
د لغمان، کونړ، پنجشیر او بدخشان ولایتونه هم د سیلابونو شاهدان دي. په کونړ کې د سېلاب له امله پنځه تنه مړه شوي دي.
د سږ کال په مې میاشت کې سختو ورښتونو او سیلونو د افغانستان په یو شمېر ولایتونو په ځانګړي ډول په بغلان کې ډېره مرګ ژوبله واړوله.
سږني ورښتونه په څه باندې ۴۰ کلونو کې بې ساري بلل شوي دي.