تاند (پنجشنبه، د سرطان ۲۱ مه) د طالبانو د بهرنيو چارو وزارت سرپرست مولوي امیرخان متقي د یوناما له مشرې روزا اتنبایوا سره په لیدنه کې غوښتنه کړې، چې هغه دې د دوحې د درېیمې ناستې بحثونه تعقیب کړي.
د ملا متقي دفتر وایي، هغه په دغه کتنه کې هیله څرګنده کړې، چې د دوحې درېیمې ناستې له ترسره کېدو وروسته د مالي او بانکي بندیزونو او د نشه یي توکو د بدیل معیشت په اړه پرمختګ رامنځ ته شي.
سرچینه زیاتوي، چې د یوناما مشرې په دغه کتنه کې ويلي چې د دوحې۳ مې غونډې د بحثونو د تعقیب په موخه به د طالبانو د رژیم له اړوندو ادارو سره له نږدې کار ته دوام ورکړي.
هغې زياته کړې؛ په کار ده، چې له دوحه۳ وروسته یې د بحثونو په اړه کابل کې د ډیپلوماتیکو حلقاتو سره پوهاوي خپرولو ناستې ترسره کړو.
د دوحې ناسته کې له ملګرو ملتونو او نړیوالو څخه د طالبانو د رژیم د استازو لویه غوښتنه دا وه چې د بانکي بندیزونو د لیرې کولو تر څنګ دې د نشه یي توکیو پر ضد مبارزه کې ورسره مرسته وکړي.