تاند (پنجشنبه، د سرطان ۲۱ مه) د پاکستان د بهرنیو چارو وزارت نن وویل چې لږ تر لږه ۴۴ زره افغان کډوال درېیو هېوادونو ته د لېږدېدو په تمه په پاکستان کې منتظر دي.
د دغه وزارت په وینا دا هغه پناه غوښتونکي دي چې د ۲۰۲۱ له اګست میاشتې وروسته دغه هېواد ته ورغلي او د دوی د کډوالۍ دوسیې په لوېدیځو هېوادونو کې منل شوي دي.
د پاکستان د بهرنیو چارو وزارت ویاندې ممتاز زهرا بلوچ نن (د پنجشنبې په ورځ د سرطان په ۲۱مه) په اسلام اباد کې په خپله اوونیزه خبري غونډه کې وویل چې له دغو کډوالو څخه ۲۵ زره یې امریکا، ۹ زره یې استرالیا، ۶ زره یې کاناډا، ۳ زره یې جرمني او پاتې زر تنه بریتانیا ته ځي.
آغلې بلوچ زیاته کړه، «موږ له هغوی څخه وغوښتل چې د دغو کسانو د انتقال لپاره د ویزو د تصویب او صادرولو بهیر چټک کړي، څو هغوی ژر تر ژره روان شي.»
هغه افغان کډوال چې د لویدیځو هیوادونو له خوا منل شوي معمولاً میاشتې او کلونه په پاکستان کې د لیږد په انتظار کې وي.
تر دې مخکې د پاکستان صدراعظم شهباز شریف د کډوالو په چارو کې د ملګرو ملتونو له لوی کمېشنر فیلیپو ګرانډي سره په کتنه کې له هغه غوښتي چې له پاکستانه د افغان کډوالو د لېږد بهیر چټک کړي.
ښاغلي ګراندي له شهباز شریف څخه وغوښتل چې د بې اسناده افغان کډوالو د جبري ایستلو بهیر ودروي.
دغه هېواد ته د کډوالو د لویې کمېشنرۍ له سفر وروسته د پاکستان کابینې اعلان وکړ چې د ۱.۴۵ میلیونه افغان کډوالو د پاتې کېدو موده یې د یوه بل کال لپاره وغځوله. د دې پرېکړې پر بنسټ، د POR کارت لرونکي کډوال کولی شي د ۲۰۲۵ د جون تر دېرشمې پورې په پاکستان کې پاتې شي.
خو ممتاز زهرا بلوچ څرګنده کړه چې هغه کډوال چې د اوسېدو اسنادو نه لري له پاکستانه ایستل کېږي.