تاند ( ۲ شنبه، د سرطان ۱۱ مه) د طالبانو تر واک لاندې د افغانستان د عامې روغتیا وزارت د کانګو ناروغۍ د زیاتوالي خبر ورکړی.
د وزارت ویاند شرافت امرخېل ویلي، چې تېره میاشت دوی پر دغې ناروغۍ د څه باندې دوه نیم سوو کسانو د اخته کېدو پېښې ثبت کړې دي.
د سرچینې په وینا، په همدغه میاشت کې یې د کانګو له امله د شاوخوا ۲۰ تنو مړینه هم ثبت کړې، چې د تېرو میاشتو په پرتله څلور چنده زیاتوالی ښيي.
یو شمېر روغتیایي څارونکي د اقتصادي ناورین او بېوزلۍ شدت او د روغتیایي خدمتونو کموالی په افغانستان کې د کانګو او نورو ناروغیو د ناروغانو د زیاتې مړینې اساسي لامل ګڼي.
پر طالب رژیم له دې امله، چې ان د روغتیایي سکتور د چارو واګې یې خپلو ملایانو ته سپارلي او روغتیاپالو سره هم سیاسي چلند کوي، توندې نیوکې کیږي.