تاند ( پنجشنبه، د سرطان ۷ مه) د سولې د نوبل جایزې ګټونکې ملالې یوسفزۍ د افغانستان په اړه د ملګرو ملتونو په کوربه توب د دوحې د درېیمې ناستې په اجنډا نیوکې کړې دي.
نوموړې په خپله ایکس یا پخواني ټویټر پاڼه کې لیکلي، چې په دې اړه یې د ملګرو ملتونو له سرمنشي انتونیو ګوتریش سره هم لیدلي او ترې غوښتي چې د دوحې د درېیمې ناستې اجنډا بدله کړي.
ملاله یوسفزۍ د دوحې ناسته کې د افغان ښځو د استازو پر نه ګډون او دغه راز د غونډې له اجنډا څخه د ښځو او بشري حقونو د بحث ایسته کولو په اړه نیوکې کړي او ویلي، چې له سرمنشي یې غوښتي چې په دې اړه بیا کتنه وکړي.
د یوسفزۍ په باور، په مشرۍ او بهیرونو کې د ښځو له ګډون پرته په افغانستان کې هیڅکله مشروعیت نه شي رامنځته کېدای.
د نوبل جایزې دغه ګټونکې زیاتوي، چې له ښځو پرته په افغانستان کې هڅې او بهیرونه خیانت دی.
د دوحې درېیمه ناسته تر راتلونکو څو ورځو د ملګرو ملتونو د سرمنشي د مرستیالې په مشرۍ جوړیږي، چې ورته د طالبانو رژیم د خپل ویاند ذبیح الله مجاهد په مشرۍ یو پلاوی د ګډون لپاره استوي.
ویل کیږي، چې ملګرو ملتونو په دې غونډه کې د طالبانو د ګډون برابرولو لپاره د دوی په غوښتنه د ښځو او بشري حقونو موضوعات د ناستې له اجنډا ویستي دي.
د ملګرو ملتونو دا کار له پراخو توندو غبرګونونو سره مخ شوی، خو دغه سازمان ویلي چې په غونډه کې د طالبانو ګډون د هغوی د رژیم د په رسمیت پېژندلو او قوي کولو په هدف نه دی؛ بلکې دوی غواړي چې طالبان دغې غونډې ته له بللو سره د افغانستان د هغو ژمنو عملي کولو ته را کاږي چې د بشري او ښځینه حقونو په برخه کې یې نړیوالې ټولنې سره کړې دي.