تاند (پنجشنبه، د سرطان ۷ مه) خبري سرچینو اعلان کړی چې د افغانستان لپاره د امریکا ځانګړی استازی “ټام ویسټ” او همداراز د جي ۷ غړو هېوادونو استازي به د دوحې په درېیمه ناسته کې د افغانستان لپاره ګډون وکړي.
تر دې مخکې د امریکا د بهرنیو چارو وزارت ویلي و چې هېواد یې تر اوسه د دوحې غونډې ته د استازي د لېږلو په اړه پرېکړه نه ده کړې.
یو شمېر رسنیو ویلي و چې امریکا له دې کبله د دوحې په درېیم کنفرانس کې ګډون نه کوي چې دا هیواد په دې غونډه کې د ښځو او مدني ټولنې استازو ته د بلنې پر نه ورکولو خوابدې ده.
له بلې خوا سرچينې وايي، چې امريکا، بریتانیا، فرانسې، جرمني، جاپان، کاناډا او ايټاليا له ملګرو ملتونو غوښتي، چې د دوحې په غونډو کې ښځې او د افغانستان د مدني ټولنې غړي شامل کړي.
سرچینه زیاتوي چې د طالبانو په غوښتنه به د دوحې د ناستې په اجنډا کې د بشري حقونو مسله نه وي او په غونډه کې به تر ډېره له نشه يي توکو سره پر مبارزې او د خصوصي سکتور پر ودې تمرکز کېږي.
دا لا څرګنده نه ده چې د دوحې د غونډې په اجنډا کې کوم بدلون راغلی دی او که د امریکا استازی د غونډې پر اجنډا د واشنګټن له اعتراض سره سره دوحې ته ځي.
طالبانو ويلي چې د دوحې په ناسته کې د اوسنۍ اجنډا پر بنسټ ګډون ته چمتو دي او په اجنډا کې هر ډول بدلون ښايي د دې سبب شي چې دوی په دې کنفرانس کې د ګډون په اړه پر خپله پرېکړه بیا کتنه وکړي.
ټاکل شوې ده چې د افغانستان په اړه د دوحې درېیمه غونډه د روان سرطان په ۱۰مه او ۱۱مه په قطر کې د ۳۰ هېوادونو او نړیوالو سازمانونو د استازو په ګډون جوړه شي.