تاند (پنجشنبه، د سرطان ۷ مه) د پاکستان د صدراعظم مرستیال او د بهرنیو چارو وزیر اسحاق ډار په یوه تازه وینا کې د کابل له طالب رژیم څخه د بشري حقونو د تامین او ټول شموله حکومت جوړولو غوښتنې کړې دي.

هغه په عین حال کې د خپل هېواد دا تور هم تکرار کړی، چې ګواکې د افغانستان له خاورې دوی ته ترهګریز خطرونه پېښ شوي او مخنیوی یې باید وشي.

د پاکستاني وزیر په وینا، د افغانستان خاوره باید د هیڅ کوم هېواد خلاف کارول کېدو ته پرې نه ښودل شي.

پاکستان د طالبانو له بیا واک ته رسېدو سره افغانستان تل په ورته تورونو تورن کړی، خو کله یې هم د خپلو دغو ادعاوو په اړه مستند اسناد نه دي وړاندې کړي.

پر کابل د طالبانو واکمن رژیم د پاکستان او یو شمېر نورو سیمه ییزو هېوادونو ورته ادعاوې تل رد کړي او بې بنسټه ګڼلې دي.