تاند (چهارشنبه، د سرطان 6 مه) په ملګروملتونو کې د پاکستان دايمي استازی منير اکرم وايي، هېواد يې نيت لري چې يو نيم ميليون نور راجستر شوي افغان کډوال هم خپل هېواد ته ستانه کړي.
اکرم د ملګروملتو په اقتصادي او ټولنیزه شورا (ECOSOC) کې پرون د وینا پرمهال یادونه وکړه چې په پاکستان کې شاوخوا یو ملیون افغان کډوال ناراجسټر دي او په زرګونو نور د اوسیدو هیڅ ډول قانوني اسناد نه لري.
د اکرم په وینا اوس په پاکستان کې ۱.۵ میلیونه راجستر شوي افغان کډوال مېشت دي.
دا پرېکړه په داسې حال کې کېږي چې پاکستان د تېر کال له اکتوبر څخه شاوخوا ۵ لکه افغان کډوال په زوره وایستل په دې پرېکړه یې د ملګرو ملتو د لویې کمېشنرۍ (UNHCR) او د بشري حقونو د نړیوالو سازمانونو له خوا انتقادونه شوي دي. دې ډلو د “جبري اخراج” لپاره د پاکستان پلان غندلی او استدلال یې کړی چې دا د کډوالو حقونه تر پښو لاندې کوي او د دې پروسې د سمدستي درولو غوښتنه کوي.
د پاکستان پارلمان په یوه بیان کې چې په ایکسپاڼه (پخواني ټویټر) کې خپره شوې، د اکرم له خولې ویلي چې په تېرو څلورو لسیزو کې پاکستان له پنځو میلیونو څخه د زیاتو افغان کډوالو کوربه توب کړی دی.
اکرم څرګنده کړه چې د پرمختللو هېوادونو د مرستو له امله د افغان کډوالو د کوربه توب دروند بار کم شوی دی.
دغه هېواد اوس د افغان کډوالو د «جبري اخراج» په دوهم پړاو کې دی.