دوشنبه, جولای 15, 2024
Homeخبرونهاتریش نن د یو شمېر غیر طالب افغان سیاستوالو د غونډې کوربه...

اتریش نن د یو شمېر غیر طالب افغان سیاستوالو د غونډې کوربه دی

تاند ( دوشنبه، د سرطان ۴ مه) د اتریش په پلازمېنه ویانا کې د دغه هېواد د یوه نړیوالو اړیکو د انستیتوت لخوا د یو شمېر غیر طالب افغان سیاستوالو دوه ورځنۍ غونډه پيلیږي.

د راپورونو له مخې، دې غونډې ته د بېلابېلو غیر طالب سیاسي او جنګي ډلو استازي او مشران ور بلل شوي.

له دې ډلې د احمد مسعود، شاه محمود میاخېل او یو شمېر نورو کسانو نومونه اخیستل شوي چې د بېلابېلو سیاسي او جنګي ډلو استازیتوب کوي.

دې غونډې ته له ورتلو سره سم د افغانستان د جمهوري غوښتونکي خوځښت استازي شاه محمود میاخېل ویلي چې دوی د ټول شموله حکومت پر ځای ټول شموله نظام غواړي چې د ټولو افغانانو استازیتوب او حقونه خوندي کړي.

له دې سره د احمد مسعود په مشرۍ د ملي مقاومت جبهې وسله والې ډلې په اعلامیه کې راغلي، چې غونډه کې به د افغانستان د راتلونکي نقشې په اړه د غیر طالب څېرو پر انسجام او هوکړې بحثونه وشي.

د ویانا مخکینۍ غونډې تر ډېره د احمد مسعود پر محور را څرخیدې چې له دې امله نیوکو سره مخ شوې وې.

څارونکي باور لري چې د طالبانو د رژیم سخت دریځي سبب شوې، چې د دوی خلاف د پخوانیو جنګسالارانو پاتې شوني بیا مطرح او د سیمې او نړۍ قدرتونو ته د افغانستان خلاف د نورو لوبو زمینه اسانه شي.

دوی له طالبانو غواړي چې د قدرت له انحصار، افراطي کړنو او زورواکۍ ژر لاس په سر او د یوه قانونمند او ولسواک نظام جوړولو لپاره افغانانو سره خبرو ته کیني، کنه د روان وضعیت د دوام او ناوړه پایلو مسوولیت به تر هر لوري ډېر دوی ته متوجه وي.

LEAVE A REPLY

Please enter your comment!
Please enter your name here

- Advertisment -

ادب