تاند (دوشنبه، د سرطان ۴ مه) د طالبانو د حکومت د بهرنیو چارو وزارت په یوه خبرپاڼه کې ویلي چې له افغانستان سره د لا باثباته، دوامداره او رښتینو خبرو د ملاتړ په برخه کې د روسیې د بهرنیو چارو د وزیر سرګي لاوروف د څرګندونو هرکلی کوي.

خبرپاڼه زیاتوي: اسلامي امارت تل ټینګار کړی چې د یوه مسوول حکومت په توګه له ټولو اړخونو سره د ګډو مسایلو په اړه هراړخیزو خبرو اترو ته، چې نتیجه ولري، چمتو دی.

د طالبانو د حکومت د بهرنیو چارو وزارت ویاند په افغانستان کې د ناامنۍ په اړه د لاوروف د اندېښنې په ځواب کې ویلي: د افغانستان حکومت د روسیې په شمول ټولو هېوادونو ته وايي چې په افغانستان کې د نیواک له ختمېدو سره د ناامنۍ عوامل له منځه تللي او اوس په دې هېواد کې د پانګونې او د سترو پروژو د پلي کولو لپاره زمینه برابره شوې ده.

لاوروف په الماتي کې د ډله ییز امنیتي تړون له غونډې وروسته ویلي و چې د داعش او القاعده په شمول جګړې ته تیارې ډلې لا هم په افغانستان کې شته.

د جمعې په ورځ په ملګرو ملتونو کې د پاکستان دایمي استازي منير اکرم د امنیت شورا په غونډه کې ادعا کړې چې د القاعده، ټي‌ټي‌پي او اسلامي دولت یا داعش خراسان څانګې په ګډون یو شمېر نورې ترهګريزې ډلې په افغانستان کې حضور لري چې د افغانستان اوسنی حکومت یې باید پر وړاندې اغېزمن او دوامداره اقدامات ترسره کړي.

ده زیاته کړه،”هغه تروریستي ډلې، چي په افغانستان کی د دولت له معافیت څخه ګټه اخلي، داسی ښکاري چې د افغانستان ټولو ګاونډیو هېوادونو او نړیوالې ټولنې ته مستقیم ګواښ دي. په پای کې دغه ترهګریزي ډلې د افغانستان موقت حکومت او د هغوی د اقتصادي او ټولنیزې پرمختیا اهدافو ته به هم یو لوی ګواښ وي.”