تاند ( دوشنبه، د جوزا ۲۸ مه) د افغانستان لپاره د روسیې ځانګړی استازی ضمیر کابلوف وایي، چې تاجکستان د شانګهای سیمه ییزو همکاریو سازمان په فعالیتونو کې د افغانستان د واکمن طالباني رژیم د ګډون مخالف دی.
نوموړي هیله ښودلې، چې تاجکستان به له دغه مخالفت څخه لاس واخلي.
د ۲۰۲۱ کال په اګسټ کې افغانستان د شانګهای د غړو هېوادونو د سازمان په فعالیتونو کې د څارونکي هېواد په توګه برخه واخیسته.
د یادونې ده چې پر افغانستان د طالبانو واکمن اسلامي امارت ویلي وو چې د شانګهای سازمان په فعالیتونو کې د یو څارونکي هېواد په توګه د دوی ګډون مشروع حق دی او نه ګډون یې امنیتي ګواښونو، نشه یي توکو سره د مبارزې، بشري مرستو او په افغانستان کې د زیربنايي پروژو د پلي کیدو په برخه کې د نه همغږۍ سبب ګرځي.
د شانګهای سازمان د بهرنیو چارو د وزیرانو وروستۍ غونډه د روان ۲۰۲۴ کال د تیرې میاشتې په ۲۰ او ۲۱ په قزاقستان کې جوړه شوې وه.