تاند ( شنبه ، د جوزا ۲۶ مه) د ازبکستان د ټرانسپورت وزیر الهام موخکاموف او په دغه هېواد کې د پاکستان سفیر احمد فاروق د ترمز، مزار شریف، کابل او پېښور د ریل پټلۍ پروژې د بیا څېړنې په اړه خبرې کړې دي.
دا ترانسپورټي دهلیز به ازبکستان، افغانستان، پاکستان او روسیه له هند او اروپا سره ونښلوي.
د دې پروژې د چارو د پیل په اړه له څو کلونو راهیسې لیدنې کتنې او خبرې روانې دي، خو د عملي چارو د نه پيل لامل یې نه دی په ډاګه شوی.
باور کیږي، چې د طالبانو د رژیم رسمیت نه لرل او دغې پروژې سره د پاکستان نه همکاري د دې ځنډ اصلي لاملونه دي.
د ازبکستان د ټرانسپورټ وزیر د پاکستان له سفیر سره په کتنه کې د دغې پروژې د لیدو او کتنې په اړه موافقه کړې.
د ورته موافقو خبرونه مخکې هم بیا- بیا خپاره شوي.
د یادونې ده چې د ازبکستان، پاکستان او افغانستان حکومتونو په ۲۰۱۹ کال کې د ترمز، مزار شریف، کابل او پېښور د ریل پټلۍ د جوړولو لپاره هوکړه کړې وه.