تاند ( شنبه ، د جوزا ۲۶ مه) د افغانستان د پرځیدلي جمهوري نظام ولسمشر اشرف غني په خپل اختریز پيغام کې دا ځل د طالبانو واکمن رژیم ته خبرداري ډوله خبرې کړي.
هغه په دې پيغام کې طالبان مخاطب کړي او ویلي: ولس مه مجبوروئ چې د لاس غوټه په خوله پرانیزي.
ښاغلي غني دا هم ویلي، هغه کسان چې په انتحار او انفجار کې یې لاس درلود باید ولس ته حساب ورکړي.
د هغه په باور، د ملت صبر ناپایه نه دی او که په زوره پرې طالبان د حکومت کولو لړۍ ته دوام ورکړي، دا صبر به پای ته ورسیږي.
نوموړي یو ځل بیا د تاوتریخوالي مخالفت کړی، خو ویلي چې د طالبانو د سخت دریځو او خپلسرو کړنو دوام به ښایي خلک تاوتریخوالي ته مجبور کړي.
پخواني ولسمشر دا هم ویلي، چې دی د هېواد د ابادولو طرحې لري او چې یو مشروع نظام رامنځته شي، دی به د مشروع ولسمشر په توګه ورته د واک مشروعیت چې په وینا یې ده سره د امانت په توګه پاتې، دغه نظام ته ولېږدوي.
ولسمشر غني طالبانو ته په غیر مستقیمه توګه دا هم ویلي چې د چا په مذهب کې باید کار ونه لري.
د هغه په وینا، مجازات او مکافات د هغې دنیا کار دی.
طالبانو له واک ته رسېدو وروسته د ولسمشر غني څرګندونو ته کوم غبرګون نه دی ښودلی.