تاند (شنبه، د جوزا ۲۶ مه) د افغانستان د کډوالو او راستنیدونکو چارو وزارت له پاکستان او ایران څخه د څه باندې پنځه زره افغان کډوالو د ایستلو خبر ورکړی دی.

دغه وزارت نن د جون په ۱۵مه په یوه خپره کړې خبرپاڼه کې وویل چې ۴۸۸۱ تنه له ایران او ۷۷۵ تنه له پاکستانه ایستل شوي دي.

د دغه وزارت پر اساس دا کډوال د پنجشنبې او جمعې په ورځو د اسلام کلا، سپین بولدک او تورخم له لارو هېواد ته داخل شوي دي.

په وروستیو میاشتو کې له ګاونډیو هېوادونو په تیره بیا له ایران او پاکستان څخه د افغان کډوالو د ایستلو بهیر چټک شوی دی.

دې جبري اخراج په افغانستان کې د هغه سخت بشري ناورین له لا زیاتېدو سره مرسته کړې چې په تیرو څو کلونو کې یې پر افغانستان سیوری غوړولی دی.