تاند(سې شنبه، د جوزا ۸مه) د ایراني رسنیو د راپور له مخې، له افغانستان څخه لومړنی ترانزیتي ریلګاډی له ۴۰ ورځني سفر وروسته د ترکیې وان ته ته ورسید.
په دغه ریلګاډي کې، چې د ثور په لومړۍ نېټه د ایران روزنک تمځي ته ورسید، ۱۱۰۰ کاني ټیږې بار وې.
د ایران د خبري آژانس ISNA د راپور له مخې دغه اورګاډی څه باندې یوه میاشت مخکې ایران ته داخل شو. ایراني رسنیو په ځنډ د دې ریلګاډي د رسیدو مبهم دلایل په ګوته کړي دي.
خو ترکیې ته د دغه ریلګاډي رسیدل مهم پرمختګ ګڼل کېدای شي ځکه افغانستان په پام کې لري چې د هرات – خواف ریل پټلۍ په کارولو سره خپل تولیدات د ترکیې او اروپا بازارونو ته ورسوي.
په لومړي وار په ریلګاډي کې د تیږو د لېږلو لپاره د ثور په لومړۍ نېټه د روزنک د ریلاګاډي په تمځي (سټېشن) کې د ریلاګاډي په وسیله د صادراتو د پیل په مناسبت یوه غونډه جوړه شوې وه چې د هرات د ریللارې ادارې د رييس ترڅنګ، د دغه ولایت د اطلاعاتو اوکلتور، سوداګرۍ او پانګونې خونو رییسانو او یو شمېر کورنيو او بهرنيو پانګوالو پکې ګډون وکړ.