تاند (سې شنبه، د جوزا لومړۍ) د خوړو نړيوال پروګرام د افغانستان د روانې میاشتې د بارانونو او سېلابونو له امله د ٥٤٠ تنو د مړینې خبر ورکړی.
د دغه سازمان یوه ویاند ضیا الدین ساپي ویلي، چې دوی زیانمنو ته د مرستو په نه رسېدو هم اندېښمن دي.
د خوړو نړیوال پروګرام د سږ کال لپاره لس میلیارده ډالرو مرستو ته اړتیا لري، چې تر اوسه یې پنځلس فیصده ترلاسه کړي دي.
دې ادارې بیا- بیا په افغانستان کې د مرستو لپاره د خپلې بودیجې له کموالي شکایت کړی، خو ظاهراً تر اوسه یې شکایتونو کوم ځای نه دی نیولی.
د افغانستان د روانې میاشتې د سېلابونو تر ټولو زیات زیان بغلان ولایت ته واړوه.
اوس اندېښنه ده چې د سېلابونو د تاوان لړۍ به دوام ولري او ختیزو ولایتونو ته وغځیږي.