تاند (پنجشنبه، د ثور ۲۷ مه) د پکتیا د ځاځي اریوب ولسوالي او د خیبرپښتونخوا د کورمې د تیري منګل د سیمو ترمنځ پر ډیورند کرښه د افغان او پاکستاني ځواکونو ترمنځ نښته پای ته رسیدلې ده.
پاکستاني رسنۍ وايي چې د کابل او اسلام اباد ترمنځ له خبرو وروسته پرېکړه وشوه چې د تګ راتګ لاره بېرته پرانیستل شي.
د ځاځي اریوب اوسیدونکي وايي چې نښته وروسته له دې وشوه چې پاکستاني پوځیانو غوښتل د ډیورند کرښې دې خوا ته ازغن سیم نصب کړي او طالب ځواکونو یې په وړاندې غبرګون وښود خو پاکستاني چارواکي وايي چې نښته وروسته له دې وشوه چې د افغانستان له لوري وسله والو کسانو غوښتل چې ازغن سیم پرې کړي او د پاکستان لور ته واوړي.
د طالبانو او پاکستان حکومتونو تراوسه پورې په دې اړه څه نه دي ویلي.
خو راپورونه وايي چې د نښتې له کبله تر نن غزمې پورې د خرلاچۍ لار بنده وه.
همداراز د یوه طالب او یوه پاکستاني پوځي د وژل کېدو او یو شمېر نورو د ټپي کېدو خبرونه ورکړل شوي دي.
د پاکستان ډان ورځپاڼې د یوه پاکستاني پوځي وژل کېدا او د ۴ نورو ټپي کېدا تایید کړې ده.