تاند ( ۵ شنبه، د ثور ۲۷مه) د پکتیا له ځاځي اریوب ولسوالۍ څخه راپورونه ښيي، چې د چارشنبې ورځې نښتو کې د طالبانو سرتېرو او پاکستاني لوري ته ځاني زیانونه اوښتي.
یو شمېر سرچینو په دې نښتو کې د ۶ طالب سرتېرو ټپي کېدل تایید کړي، خو ویلي چې پاکستاني لوري ته هم مرګ ژوبله اوښتې ده.
ویل کیږي، چې د پاکستاني ځواکونو په ډزو یو شمېر افغان ملکیان هم ځاني زیان لري.
پاکستان په وروستیو کې بیا- بیا ډیورنډ کرښې ته څېرمه د افغانستان د حریم د نقض باعث شوی، چې د طالبانو سرتېرو یې پر وړاندې غبرګون ښودلی او د نښتو خبرونه ورکړل شوي.
د طالبانو چارواکو او پاکستاني لوري د وروستیو نښتو په تړاو څه نه دي ویلي.