تاند (۴ شنبه، د ثور ۱۹ مه) د افغانستان په لویدیځ ولایت هرات کې د قزاقستان د سوداګرۍ خونې څانګه په رسمي توګه پرانیستل شوه.
په دې مراسمو کې د طالبانو د سوداګرۍ او صنعت وزیر نورالدین عزیزي ویلي چې دغه خونه د دواړو هېوادونو د سوداګریزو اړیکو په پیاوړتیا کې ښه رول لرلی شي.
هغه دا هم ویلي، چې په استانه کې د افغانستان – قزاقستان له ګډ سوداګریز نندارتون څخه وروسته د دواړو هېوادونو سوداګریزې اړیکې پراخې شوې دي.
قزاقستان وروسته تر هغه په هرات ولایت کې د سوداګرۍ څانګه پرانیزي چې هرات څو ورځې وړاندې د قزاقستان، ترکمنستان او د طالبانو د حکومت او افغان سوداګرو د یوې غونډې کوربه و.
هغې غونډه کې موافقه وشوه چې هرات کې به یو لوی لوجیستیکي مرکز هم پرانستل کیږي.
د طالبانو رژیم که څه هم تراوسه د کوم هېواد له خوا په رسمیت نه دی پېژندل شوی، خو د روسیې او چین په ګډون د سیمې او ګاونډ یوشمېر هېوادونه ورسره سوداګریزې او اقتصادي اړیکې پالي.