تاند (۴ شنبه، د ثور ۱۹ مه) الجزیرې تلویزون د بدخشان لپاره د طالبانو د یوه امنیتي مقام له قوله ویلي، چې د دغه ولایت په مرکز فیض اباد ښار کې نننۍ چاودنې ۶ تنه وژلي او ۱۳ نور ټپیان کړي.
د راپورونو له مخې، دغه چاودنه د دې ولایت د فیض اباد ښار په جوزګون سیمه کې د طالبانو د د نشه یي توکو د مبارزې ریاست د ځواکونو پر رنجر موټر شوې ده.
معلومه نه ده، چې وژل شوي او ټپیان شوي ټول طالبان که نور خلک هم پکې شامل دي؟
طالب چارواکو رسماً د دې چاودنې د مرګ ژوبلې په اړه څه نه دي ویلي.
دا چاودنې له هغې وروسته کیږي، چې پرون د طالبانو عمومي ویاند ذبیح الله مجاهد او د دوی د ځواکونو لوی درستیز د کوکنارو د کښتونو د اړولو په سر له خلکو سره د پېښ شوي جنجال د حل و فصل خبر ورکړ.
په دې جنجال کې چې له تېرې جمعې راهیسې پيل شوی و، د دوو تنو د وژل کیدو او یو شمېر نورو د ټپي کېدو خبر ورکړل شوی.
یاده مرګ ژوبله د طالبانو په ډزو رامنځته شوې ده.
پر طالبانو د نننۍ چاودنې مسوولیت تر اوسه کومې ډلې پر غاړه نه دی اخیستی.