تاند ( ۲ شنبه، د ثور ۱۷ مه ) بل ګټس بنسټ د افغانستان د بنسټیزو روغتیايي چارو لپاره ۱۵ میلیونه ډالره مرسته ځانګړې کړې ده.
د طالبانو د بهرنیو چارو وزارت ویلي چې دا یادونه د روغتیا د نړیوال سازمان د ختیځې مدیترانې د سیمې مشرې ډاکترې حنان حسن بلخي پرون د طالبانو له بهرنیو چارو وزیر امیرخان متقي سره په لیدنه کې کړې ده..
ډاکترې حنان همداراز افغانستان او پاکستان کې د پولیو یا د ماشومانو د ګوزڼ د له منځه وړلو لپاره د هغو ۵۰۰ میلیونو ډالرو یادونه کړې چې ګټس بنسټ او ځینې نور تمویلونکي یې د روغتیا نړیوال سازمان او د ماشومانو وجهي صندوق یونیسف ته ورکوي.
د متقي په حواله په دې بیان کې راغلي چې دوی له دې مرستو منندوی دي خو د روغتیا له نړیوال سازمان غواړي چې د طالبانو استازی په دغه سازمان کې ومني.
د طالبانو اعلامیې نه دي روښانه کړي، چې د بنسټیزو روغتیایي چارو لپاره دا مرسته به په مشخصه توګه په کومو سیموکې پر کومو روغتیایي چارو ولګول شي.
افغانستان په وروستیو کې د نورو سختو ننګونو تر څنګ د روغتیایي خدمتونو د کمښت او ناروغیو د زیاتوالي له بحران سره هم مخ دی، خو طالب چارواکي د دغو خدمتونو د ښه والي ادعا لري.
ددغه ابلیس دجال مرسته ټوله له زهرو ډکه دغه د بشریت دښمن ته باید طالب جان د نه ځواب ووایی 😡