تاند (جمعه، د ثور ۷ مه) د طالبانو د بهرنیو چارو سرپرست وزیر امیرخان متقي وايي، د افغانستان درې ګاونډي هیوادونه د داعش په وده کې ونډه لري.

ښاغلي متقي، چې پرون د افغان – قزاق نندارتون په پرانستونکې غونډه کې خبرې کولې، د کوم هیواد نوم وانخیست خو ادعا یې وکړه چې یو هیواد د داعش خراسان څانګې ته بشري قوه برابروي، بل د تګ راتګ لارې ورته چمتو کوي او درېیم ورته ځای ورکوي.

که څه هم په افغانستان کې د داعش حملې کمې شوي خو امریکا او یو شمېر نور هیوادونه وايي چې داعش په افغانستان کې خپلې ریښې پراخوي او د سیمې هیوادونو ته یې اندېښنې پیدا کړي دي.

تېره اوونۍ له یوې نسبتاً اوږدې مودې وروسته دې ډلې په کابل کې په یوه موټر د مقناطیسي بمي چاودنې مسوولیت په غاړوه واخیست چې په لړ کې یې څو تنو ته مرګ ژوبله واوښته.

متقي وویل:«له بده مرغه درې ګاونډي هیوادونه په نوبت یو داعش ته بشري قوه برابروي، بل دې ډلې ته لاره ورکوي او ورانکاري کسان یې له خاورې تیریږي او بل داعش ته اډه، پیسې او پلانونه چمتو کوي. که دا درې هیوادونه پر خپلو مسوولیتونو عمل وکړي نه به په افغانستان او نه به په سیمه کې کومه ستونزه وي.»

د طالبانو د باندنیو چارو سرپرست وزیر د کوم هیواد نوم یاد نه کړ خو مخکې ځینو طالب چارواکو پاکستان د داعش په ملاتړ تورن کړی و او حتي ویلي یې و چې په افغانستان کې د داعش اکثره نیول شوي غړي پاکستانیان دي.

دې ته په کتو چې د مسکو په برید کې د داعش شامل کسان د تاجکستان اتباع و، باور کېږي چې د متقي اشاره به تاجکستان ته هم وه. داسي راپورونه هم شته چې پاکستان او تاجکستان د طالبانو پر ضد د مقاومت د ملي جبهې د ملاتړ په اړه خبرې کړي دي.

که څه هم ظاهراً ایران د داعش کلک مخالف دی خو ویل کېږي چې د داعش غړي د افغانستان او عراق او سوریې ترمنځ غالباً د ایران له لارې تګ راتګ کوي. خو څرګنده نه ده چې د ښاغلي متقي اشاره به بل کوم هیواد ته وي.