تاند (پنجشنبه، د ثور ۶ مه) د ترکیې رسنیو راپور ورکړ چې د دغه هیواد پولیسو په یوه میاشت کې تر ۱۰۰۰ ډېر افغان او پاکستاني پناه غوښتونکي نیولي دي.
د انادولو خبري اژانس د راپور له مخې، د ۱۰۹۶ نیول شویو پناه غوښتونکو اکثره په ادیرنه ولایت کې نیول شوي چې د ترکیې په شمال لوېدیځ کې دی.
د ترکیې حکومت د غیرقانوني کډوالو د موندلو او نیولو لپاره په وروستیو کې په لارو کې د تلاشۍ پوستې زیاتې کړي دي.
د دغه هیواد د کورنیو چارو وزیر په وروستیو کې وویل چې د خپل هیواد په ۳۰ ښارونو کې یې د ګڼو پوستو د جوړولو ترڅنګ د تلاشۍ سیار یا ګرځنده ټیمونه هم زیات کړي دي.
اکثره افغان، پاکستان، عراقي او ایراني پناه غوښتونکي له ترکیې څخه اروپا ته د ټوپ د تختې په توګه کار اخلي.
دوی په ترکیه کې د قاچاقبرو له لوري په بیړیو کې یونان او نورو اروپايي هیوادونو ته لېږدول کېږي.
ترکیې په وروستیو څو کلونو کې سلګونه افغان کډوال له نیولو وروسته افغانستان ته راستولي دي.
دغه پاکستانیان چې اروپا ته راورسېږي نو سملاسي ځان افغان معرفي کړي او په جعلي او تقلبي افغان پاسپورتونو او نورو اسنادو په اروپا کي د افغان په نوم پناه واخلي.