تاند (یکشنبه، د ثور ۲ مه) ایران له افغانستان څخه ترکیې ته د ریلګاډي په وسیله د کاني تیږو د صادرېدو مخه نیولې ده.
د ایران ایلنا خبري اژانس نن (یکشنبې) راپور ورکړ چې ایرانی چارواکي د افغانستان پولې ته څېرمه د روزنک په تمځي کې هغه ریلګاډي ته د تګ اجازه نه ده ورکړې چې ټاکل شوې وه له افغانستان څخه د تالک تیږې ترکیې ته یوسي.
پرون د افغانستان د ریللارې ادارې اعلان وکړ چې په لومړي وار یې د ریلګاډي په وسیله د ایران له لارې ۱۰۰۰ ټنه معدني تیږې ترکیې ته صادرې کړې.
په خبرپاڼه کې دغه راز ویل شوي و چې د ترکیې مرسین ښار ته د دغو تیږو د لېږلو لپاره د روزنک د ریلاګاډي په تمځي (سټېشن) کې د ریلګاډي په وسیله د صادراتو د پیل په مناسبت یوه غونډه جوړه شوه چې د هرات د ریللارې ادارې د رييس ترڅنګ، د دغه ولایت د اطلاعاتو اوکلتور، سوداګرۍ او پانګونې خونو رییسانو او یو شمېر کورنيو او بهرنيو پانګوالو پکې ګډون وکړ.
خو اوس څرګنده نه ده چې ایراني چارواکو ویلي د دې ریلګاډي د تګ مخه نیولې ده.
ایلنا خبري اژانس ته یوې سرچینې ویلي چې ښايي ایراني چارواکو د دې ریلګاډي د تګ مخه په دې خاطر نیولې وي چې د ریلګاډي جوړوونکي قراردادي کنسورشیم ته یې خپل پور نه دی ورکړی.
ویل کېږي چې د ایران حکومت د قراردادي کنسورشیم پوروړی دی.