تاند (یکشنبه، د ثور دویمه )د خوست د امنیه قومندانۍ لپاره د طالبانو د رژیم چارواکو د دغه ولایت په اسمعیل خېلو او مندوزیو ولسوالۍ کې د انسان تښتوونکو له منګولو څخه د يوه ماشوم د ژغورنې خبر ورکړی دی.
د دوی په وینا، د یو لړ عملیاتو په ترڅ کې پرون د اسمعیل خېلو او مندوزیو ولسوالۍ په حسن زیو کلي کې یو ماشوم چې د خوست ښار له ماټي خان مارکېټ څخه تښتول شوی و د انسان تښتوونکو له منګولو څخه ژغورلی دی.
سرچینې زیاته کړې چې انسان تښتوونکي له سیمې تښتېدلي خو امنیتي ځواکونه یې د نیولو هڅې کوي.
په ورته وخت کې طالب چارواکو د ډېرو تښتول شویو کسانو د خوشې کېدو او د تښتونې په تور د ځینو خلکو د نیولو خبر ورکړی.
اقتصادي ناورین، بې کاري او دغه راز د طالبانو په رژیم کې د مسلکي پولیسو او امنیتي ځواکونو تشه د جنایي جرمونو د زیاتیدو عمده لاملونه ګڼل شوي دي.